نبداو على بركة الله
المقادير :
- 250غ مرغرين طرية
- نصف كاس زيت
- نصف كاس سكر ناعم
- نصف كاس مايزينة
- ربع كاس عصيرالبرتقال
- قشور حبة برتقال
- نصف خمارة
- ملون برتقالي و الفرينة حتى تتلم العجينة
الكريمة:
- 125 غ مرغرين طرية
- 50 غ سكر ناعم
- ربع كاس عسيلة
- 50غ شانتيي غبرة
- كاس شاي عصير البرتقال و قشور البرتقال
الطلية:
عصير البرتقال مصفى و سكر ناعم مغربل و ملون برتقالي
التحضير:
الكريمة:
نضرب المرغرين و السكر و عصير البرتقال و القشور و العسل و نطلع مليح ثم نزيد الشانتيي بودرة حتى تطلع مزيان و نخليها في الثلاجة حتى لوقت
الاستعمال ضروري جدا
العجينة:
نضرب المرغرين و السكر و الزيت و الملون البرتقالي و نخدم جيدا بالباتور او بكف اليد ونزيد عصير البرتقال و المايزينة و نصف خمارة و نلم
بالفرينة و اللون البرتقالي لازم يكون فاتح و نحل العجينة بالحلال رقيقة كل واحدة و الشكل اللي تحبو انا خيرت القلب نطيبها كيما الصابلي عادي و
نخليه يبرد بعدها نجبد الكريمة و نلصق 2 حبات مع بعض تخرجلك حوالي 40 حبة متلاصقة
بعدها ناتي للطلية و هي تشبه للفوندون عصير البرتقال مصفي و ملون برتقالي و سكر ناعم حتى يتلم الطلاء نطلي الحلوة و نخليها تنشف و نزينها
بعجينة اللوز او بالشكلاطة سوداء ا و حبة مندرين بعجينة اللوز او ممكن تزينيها بنواد كوكو برتقالي كي ماتكونش للضياف و تدريلها من فوق حبة جوز
او لوز و تقدم في لكيسات روعة خاصة لمحبي و عشاق البرتقال
نصائح مهمة :
اولا العجينة لازم نحلها شويا رقيقة حوالي نصف سم على الاكثر و نحله على نايلون باش يساعدنا وتحافظ على شكلها
ثانيا الفرن نشعلها من تحت ونطلع الصينية للفوق يعني تطييب كيما قاع لي صابلي واذا شفنا طابت ومن تحت واحتجنا نشعله من فوق نشعله لدقائق قليلة فقط يطيب ولكن يجب ان لا يتغير لونه
هذه الكمية قطعتلي حوالي 40 حبة متلاصقة ولكن السمك درته رقيق يعني كل وحدة حسب السمك اللي تحل بيه
الكريمة الكمية اللي مديتها دراتلي نصف الكمية لان نحب الكريمة طبقة باينة لكن انتم كل وحدة والذوق تاعها اذا حبتي الكريمة كيما انا ضاعفي الكمية تاعها
او ديري نصف الكمية العجينة ومع كمية الكريمة هاذي راهي تجييييك في علبة 250غ في زوج
حبيباتي الصابلي هش جدا راه يتكسر معاكم يعني لازم نلصق بلطف يعني ديروا الكريمة كا مل على سطح الحبة الوحدة ثم حطي اختاها فوقها بمعنى انك ما تحطيش الكريمة في الوسط وتقولي نضغط عليها رايحة تخرج في الجوانب راهي هشة وتتكسر معاك
والطلاء حبيباتي العصير تاعه يكون مصفى عكس الكريمة والعجينة
والطلاء يكون خفيف شويا على الطلاء العادي تاع المخبز او التشاراك او…….. يعني ثقيل لكن سائل نوعا ما
وما نغطسش الحبة في الطلاء بل نحطها على شباك تحته سنيوة صغيرة ونفرغ الطلاء على الحبة بالمغرف وهي فوق الشباك واللي يقطر نعاود نستعمله عاديييييي
ونتركها تجف تماما ثم نحي بقايا الطلاء من تحت برفق بالسكيييين يعني نكرطها راهي هشة ههههههههه باش يجي الشكل متحوف ثم نزين بالوردة والطلاء اللو ن المغاير حسب الصورة او حسب الرغبة
نتمنى نكون قدمت كل النصائح الهامة
